Sunday, October 16, 2005

يلعن أبو القرش


وقفت أمام المرآة
تنتف بعضا من شعيرات حاجبيها المشذبتين
تشد خدودها في محاولة أن تفرد أجزائها المتدلية
عيناها الخضراوتين،أنفها الدقيق ، شعرها المسترسل التي تحاول أن تخفي شيبه الزاحف
كل ذلك يشي بجمال دفسه الزمن منذ فترة طويلة
تبدأ في تناول الروج الأحمر و تصبغ شفتيها الرفيعتين
و تكمل زينتها في تأني بمكياجها الرخيص
نظرت النظرة المعتادة لوجهها في المرآة و رجعت إلي الوراء
ترفع صدرها المحشور في الحمالة و تُعدّل من شكله
و تتأمل جسدها وسط الضوء الشاحب للحجرة

-ياختي علي جمالك يا (زوبة)....صحيح...يلعن أبو القرش
تمشي مبتعدة عن المرآة و ثنايا الفستان القديم تفضح تكورات جسدها المتحرك
و أغلقت الباب بعد مغادرتها الحجرة متهيأة للموت باحتراف و علي وجهها الضحكة إياها.....


13 comments:

BLUESMAN said...

سلام
كأنني اشاهد مشهدا سينمائيا
شكرا لتفاصيلك
والقرش الله ينعل ابوه

Ahmed Shokeir said...

طريقه جديده للإستعداد للموت

mindonna said...

نجيب : شكرا يا ريحان:)

شوكير : في الحقيقة أنا مكنتش أقصد الموت الفعلي

أنا قصدي بالموت حاجة تانية ، علي الأساس ان الإنسان ممكن يموت برده ألف مرة من غير ما قلبه يقف و لا حاجة

Pianist said...

اعتقد انها تملك وجهة نظر مختلفة عن وجهة نظرك
فما ترينه انتي موت تجده هي الوسيلة المثلي للعيش ولممارسة الحياة

mindonna said...

يا شيخ!!

يعني انت جربت مرة تكون ست و اكتشفت ان الحكاية فعلا مطلعتش بهذا السوء

لا في فرق شاسع بين ما تخسره المرأة و ما يخسره الرجل في المواقف دي

دائما الست هي اللي في وش المدفع
و الست دي تجاهلت الموضوع ده و استمرت علشان القرش
يلعن أبوه

ايــــــــــــــــــوب said...

جميلة وفيها وضوح و تكثيف بس عبارة "بجمال دفسه الزمن" خرجتنى بره المود

Ahmed Shokeir said...

المعنى وصل.. فعلا ماهو باين من العنوان

Hany Mihanny said...

عارفه وانا عمال اقرائها مكنتش قادر ابعد عن خيالي فيلم اشارة مرور لخيري شلبي!؟
""
فاكره البنت اللي كانت عماله تلف في الاشارة تعرض نفسها"ألفرير ..الاكسسوارات..الجمال الارستقراطي"
تحديدا لم تقف قدام شباك عربية عزت ابو عوف وهي بتقله:-
عشرة جنيه أجيب بيها صباع روج!؟
مش عارف بقه ان كنت فهمت صح ولا غلط
كمان مش هعلق علي اللغة او طريقة السرد
سلام

sydalany-وش مكرمش said...

حلوة
معمولة بمعلمة

KING TOOOT said...

الموت أحاسيس مليانه برود
مش لازم يبقى كفن و تبوت
الموت ممكن بيكون أحساس
طيب و خجول مابقاش موجود
و عـجـبـى
_______________________

الست دى ماتت مشاعرها
من يوم ما أدت روحها لغيرها
و الأسباب كانت مفهومة
الفقر كسر لها مناخيرها
و عـجـبـى
_______________________
KING TOOOT

mindonna said...

يحي مجاهد : أنا مشفتش الفيلم للأسف

لو شفت قايمة الأفلام اللي نفسي أشوفها هتشفق عليا صدقني

و طبعاً ده بسبب قلة مصادر الأفلام الجيدة المراد رؤيتها

وش مكرمش : شكراً يا باشا:)

أحمد فوزي : أهلا بيك

أنا سعيدة انك بتقول انها تصلح لكاميرا خان ، أنا بعتبر الراجل ده عبقري

كويس انها تركت انطباع سينمائي عند الجميع
انفع أخرج يعني:)؟

كينج توت : كالعادة دايما بتفهمني يا توت
و كلامك حلو أويييييييي
كالعادة برده:)

BLUESMAN said...

سلام
حضرت هنا للمتعة
ولأنني لم أجد موضوعا جديدا فإنني أكرر
يلعن ابو القرش

mindonna said...

:)