~~مرسال المراسيل~~

~~مرسال المراسيل~~

سلام عليكم.....

كنت قاعدة مع صاحبتي (ر) العزيزة , لما كنا في معسكر في (اسكندرية ) و كنا قاعدين علي الكورنيش بالليل ووشنا للبحر و معانا كباية الشاي بالنعناع العتيد و الهوا الرباني الجميل , يا سلااام يا (ريري ) و لا قاعدة خمس نجوم في أي كافتيريا قافلة و مكيفة , مش كده ؟
- اه و الله فعلا و أحلي حاجة ان احنا في معسكر من غير أهالينا الحلوين اللي كانو هيجرجرونا وراهم في الرايحة و الجاية
- اه فعلا , كان زمانهم لسه بيشوروا نفسهم هيقعودوا النهارده و لا هيتفسحوا، ولو هيتفسحوا هيروحوا فين
- اه صحيح , معرفتيش ان فيه مجلة لازم نعملها في آخر الاسبوع؟
- مجلة ايه دي !! هو احنا في ابتدائي؟ اتجننوا و لا ايه
- قالنا ممكن تكتب أي حاجة احنا عاوزينها
- ممممم
و بعد فترة من التفكير لا بأس بها توصلنا الي إن احنا نبعت مراسيل للناس الحلوة اللي في البلد. بما ان احنا شعب الملاوعة و الرسايل و التلاقيح اللي من ورا لورا بسبب ما عانيناه من آلاف السنين من القمع، فاتعودنا إن كل شيء بالتلميحات لغاية ما اخترعنا النكت والالفاظ و برده الأشعار و القصص الرمزية!!

و العبدة لله، بقايا أعصابها متستحملش تتابع كل الأغاني بتاعة اليومين دول..... لكن صديقتي (ر) أعصابها متينة و الحمد لله حافظة أغاني كتير من الجديد. فتعاونا معا لنبعث المراسيل دي :

- حستي ..أقصد حسني مبارك : خايف أقول اللي في قلبي

- أحمد نظيف (بتاع القطنة مابتكدبش): يا نخلتين في العلاااااالي
- صفوت الشريف : كل مرة أشوفك فيها ببقي نفسي أ...أ... اااااه
- الشيخ المفتي : كل دا يطلع منك انت
- نوال السعداوي : الدنيا مج مج نونة نونة نونة
أما وزير الثقافة فاروق حسني فاختلفنا فيه كتير، ياتري نبعتلو تهنئة علي أقدميته الساحقة في الوزارة ، و لا علي هواياته الخفية اللي خرجت عن مواضيع الفن خالص ؟!!
المهم غنيناله : كلام الناااس لا بيقدم و لا يأخر ....كنوع من المواساة لسيادة الوزير اللي بياكلو في سيرته يا عيني!!
- أمريكا : هما مالهم بينا يا لييل
-أيمن نور: كلهم بيقولوا كده في الاول (مع اني بفكر انتخبو يا جماعة )
-عمرو موسي، بالتأكيد : ظلموه...اااه...ظلموه
(و يمكن كانت في مراسيل تانية بس أنا مش فاكراها)
و حبينا نغني للبحر برده حاجة ... بس البحر باين انه كان قرفان من صوتنا لأنه طرطش علينا بموجة جامدة ...و ماله ... ضرب الحبيب زي أكل الزبيب !

~ ~ ~ ~

-أنا توصلت لسايكولوجية خاصة بالبحر يا (ر)
- و ايه دي بقي ان شاء الله ؟
- مش أحيانا تلاقي البحر لونه أزرااااق اوي و مزهزه كده يوميها بيكون البحر فرحان ، ولما تلاقيه تاني يوم لونه باهت شوية بيكون زعلان .. جايز يكون يوميها حد غرق في البحر و لا حاجة ... و دايما بحس انه بيسخر مننا البشر أوي يا (ر )، و اكمنه يا عيني بقاله آلاف السنين بيسخر مننا بقت السخرية مريرة، زي الناس الحكما العارفين كده يسخروا و ميقولوش حاجة
- ربنا يشفيكي يا بنتي
- ( زغرة من عندي مع شتمتين حلوين)
نستمر في تأمل البحر و الاستمتاع بالهواء الرباني اللوكس أبو فايف ستارز، متأملة سخرية البحر اللي بتشاركوا فيه -رفيقته الابدية ليوم القيامة- السما. آه يا (اسكندرية) ..... ياللي واخدة سمعتك الحلوة علي قفا البحر اللي قدامك ... إنتي فعلا عروسة حلوة

~ ~ ~ ~