Friday, August 19, 2005



يا عيني ع الوله


كان يا ما كان, كان في طفل اسمه (سوسو )
الوجه... سبحان الخالق, صبوح الوجه جميل البسمة , و كان هادئا مثل النسمة , رقيقا مثل العصفور
و كان له أب قاسي , كان يريد أن يجعله رجلا خشنا , لم يعجبه رقة (سوسو) فكان يضربه باستمرار لكي يطيعه
يضربه من أجل الصلاة , و من أجل قراءة القرآن , و كان لا يبتسم ابدا , وكان سوسو لا يفعل شيئا الا البكاء , لماذا يفعل أبي هكذا ؟
كانت له جارة اسمها توتو , طفلة جميلة مثله , كان يلعب معها , وكانت عزاءه الوحيد , فكانت أمه تخاف من ابيه و لاتحميه , و كانا يلعبان معا باستمرار....و لكن بعد سنة و نصف ... لم تعد تلعب معه ... فأم توتو قالت له عيب أن تلعب انت و توتو معا , فهي قد كبرت الان .... كيف ؟!! انها مازالت في العاشرة , ... و لكن هذا ما حدث
و شيئا فشيئا بدأ يفهم اشياء كثيرة و لكن فهم غير مكتمل نظرا لعقله الصغير
الانفراد بالبنت و الولد عيب و حرام , اللي ميصليش يدخل النار , و اللي يعمل كذا و كيت يدخل الجنة و هكذا أخذوا يلقنوه
ثم بعد سنين قليلة ارتدت توتو غطاء علي رأسها , لماذا ؟ ان شعرها كان طويلا و جميلا , ماذا حدث ؟!! لأن الحجاب فرض
و هكذا يكتشف سوسو أن أساس بلاءه في الحياة هو الدين و الناس , فيكره الدين , و يكره الحرام و الحلال و أبيه وكل شيء يمت بصلة لهذه الاشياء
ضاعت البسمة البريئة و الرقة , و تملكته روح سخرية عاتية ,وأصبح أساس رسالته في الحياة
(يا جماعة الدين دا كدب , و الحجاب دا زفت , ايتها الفراشات المحترقة , يا... , دا أفيووووون)
و هكذا...... ضحية أخرى من ضحايا المجتمع الخاطئ

وهناك الكثير من ال "سوسو"


كثير من الناس يخالطون بين الدين و التقاليد
معروف ان التقاليد قد وجدت كقيود للبشر و قائمة علي مقياس (العيب و اللي مش عيب ), و ما يصح و ما لا يصح و خلافه....
و كل هذا في الواقع من أجل إرضاء الناس , و بالتالي فإن هذا يجعل بينك و بين نفسك حجاب كبير اسمه الناس , و لا تدرك ابدا ما هي في حقيقة طبيعتك و الحياة كلها تصبح كدب في كدب .......و غالبا ضحايا التقاليد يبدأوا بالتمرد عليها بطبيعة الحال , و معها يتمردوا علي الدين
و هنا نأتي لنقطة الدين ...غالبا يستخدم الناس التقاليد كيفما يحلو لهم باسم الدين
مثلا في حالة المرأة , فالرجال يستخدمون تعاليم الدين لكبت المرأة بينما ما يقولون ليس من الدين في شيء
و بالتالي الضحية نفسها تكون كرهت الدين و بيت سنين الدين , فتتمرد علي كلاهما
بينما اعتقد ان الدين عكس التقاليد , فالتقاليد قائمة علي عبادة الناس لأنك تظل مقيدا بآراء الناس و تصبح مشغولا بإرضائهم , بينما الدين يقوم علي عبادة الله , سواء اعجب هذا الناس ام لا
و بما أن معتنقين الدين هم الناس , و الناس يختلفون فتري منهم المتعصب و المنافق و الفاسد و النص نص , و ينسب كل هذا للدين , فاذا كان الشخص متعصب ينسب هذا التعصب للدين و هكذا

...

لا أدري و لكن قد رأيت في الدين ملاذي , و لا أري في ذلك عيبا لأنه دين يحترم الانسان بينما التقاليد لم تحترمني
وما أراه هو أن هنالك ناس معقدين نفسيا ,لا يحتملوا أبدا أن يكونوا (مكبوسين) فيظل يجعجع بترهات لا أول لها و لا آخر تنم عن سطحيته و عنجهيته , و(آل ايه كاتب قصة حياة واحدة اسمها سلمي ياعم روح اتلهي فلقتنا)
عموما اذا كان علي الحقول الخصبة اللي تنبت فيها العقد النفسية فدي تلاقيها عند مجتمع زي مجتمعنا كده , ميربيش غير العدوانية اللي عمالة ألاقيها في كل مكان
و أنا برده عندي عقد , و أكيد كلنا فينا عقد , بس اهم حاجة نكون عارفين نوعها عشان نعرف نعالجها , بس حضرته (الشيطان) مش عارف انه معقد لسه
الشخص الذي لا يحتمل اختلاف الآراء , هو مصاب بالتأكيد بخلل في الشخصية

33 comments:

أحمد said...

أنا سوسو

- هتسعدنى ... اتبرع ولو بجنيه

أنا معقد نفسياً
ساعدنا في بناء مستشفى 5656 لمرضى المعقدين من الدين

اتبرع و لو بجنيه تضامنك لوحده مش كفاية

أحمد said...

مرقص
معقد من الدين تلقي العلاج من العقدة و الحمد لله خف و بقي كويس


لسه سوسو و غيره اطفال كتير ، ساعدوا سوسو ، ربنا يخليكم

6565
مستشفى معقدي الأديان


اتبرع ولو بجنيه

أحمد said...

ربنا يخلى لنا ماما سوزان و ماما ميندونا اللى اهتمت بينا نحن المعاقيين المعقدين الذين نبذنا المجتمع

و من موقفنا هنا بنشكر ماما ميندونا على مشروعها القومى لإنشاء مستشفي لعلاج معقدى الدين مثالى

ربنا يخليكى يارب
و تعالجى كل المعقدين من الدين يا رب

IronMask said...

ههههااهاهاهاهاهاهاهاههاهههههه


معلش اعذورني ما قدرتش امنع نفسي من الضحك ، لأنه مقولة انه الدين صح و العيب في المجتمع من اسخف الطروحات اللي انطرحت كتحليل لوضعنا الحالي

شوفولنا نظرية تانية ، علشان انا معقد كمان وبحاجة لعلاج :)

ههاهاهههههاهاهاههاهاهاه

mindonna said...

اهلا سوسو
و مين قال ان انا هتبرعلك يا خويا ,
انت لو رحت انتحرت يتنضف العالم شوية من بلاويه

mindonna said...

يالا روح لليمين در و شوف لنفسك طريقة للانتحار

R said...

ـ"الشخص الذي لا يحتمل اختلاف الآراء , هو مصاب بالتأكيد بخلل في الشخصية"...

صَدَقتِِ.. صَدَقتِ..!
ـ

mindonna said...

انت بتتريق يا راء و لا بتتكلم جد و لا اييه , لحسن انا زهقت من نبرات السخرية اللي في كل حتة

mindonna said...

علي فكرة انا مش متدينة جدا زي الناس المتدينة التانية , بالعكس انا بلبس طرحة عادية جدا زي اغلب البنات , بس كل الحكايةان انا مستغربة من كم المادية و الشك في الدين للدرجة دي , ودا حاجة انا بأسف عليها مع اني كنت متوقعاها , عموما كل واحد حر في تفكيره زي ما أنا حرة برده في اختياري للي بؤمن بيه
و كل واحد ينام عالجنب اللي يريحوا بقي

mindonna said...

بالمناسبة , ياريت ياآيرون ماسك انت كمان تروح تنتحر , عشان مش طايقاك

Anonymous said...

ميندونا..بالراحة على نفسك يا ستي:)

طب انتي حضّرتي العفريت بنفسك المرادي..تعرفي تصرفيه؟! :)

بالراحة:)..بالرااااحة:)

mahmoud zidan said...

ممكن تروقى كده وتهدى اعصابك... اجيب لك ليمون
بصى يا ست ميندونا ... بدون التلميح الى اى شخص بذاته .. اضيف على تحليلك الموضوعى للمشكلة دى .. ان بعض الشرقيين عندما يقرا كتابات الغرب فى ان الدين هو سبب الرجعية الشرق اوسطية ...والحريات والمساواة .. سواء كان اسلامى او مسيحى ..مع العلم ان تلك المسميات موجودة فى كل كتب الاديان السماوية على الاطلاق... وفى حالة من الانبهار لهذا الكلام بدون الحصيلة الدينية ... يبدا عقله فى التشتيت والبرجلة .. وايضا حينما يسافر بعض من اصحاب النفوس الضعيفة والنظرة القاصرة الى الغرب ..ينبهر بما فيه من تقدم ..ويفسر الحريات تفسيرا خاطئا كنوع من انواع التعرى ... او اللى عايز يعمل حاجة بيعملها ... دى اضافة بسيطة على اللى انتى قولتيه

الحقيقة المقالة فيها جزء كبير من الصحة ... بس ما كانش فيه داعى لتوجيه الاتهام لشخص بعينه ... كان يكفى ان يكون تلويحا من بعيد

R said...

ـ"انت بتتريق يا راء و لا بتتكلم جد و لا ايه؟"
أنا بتكلّم جد طبعاً.
لكن من الواضح أنّ كليكِما لا تتحملان اختلاف الآراء، كلّ بطريقته.
لكن ما حدّش يقدر ينكر أنّ إبليس هو اللي بدأ بجر شَكَلِك. هنشوف أخرتها إيه!

المهم ما تخليش هجوم إبليس يؤثر على محتوى مدوّنتك ونبرة صوتك، وإلا يبقى هو نجح في استفزازك، ومتهيّألى هذا أحد أهم أهداف إبليس في تدوينه. وأنا بالمناسبة من قرائه من زمان، ويعجبني أسلوبه (علشان ما حدّش يتهمني أنّي بوشّين ولا حاجة). لا أعتقد أنّ إبليس معقّد من الدين، أظنّه يريد تحطيم جميع القيود التي بداخله. وهذه مرحلة قد تطول وقد تقصر. وكلنا عانَيْنا من جر شكله من قبل، بس اتعوّدنا.

كمان هو قدّم لك خدمة كبيرة، فقد نشر مدوّنتك لأنّ مدوّنته واسعة الانتشار. استفيدي بذلك وكيديه :)

بالمناسبة يعني إيه اسم المدوّنة: ترفشخنات؟

mindonna said...

شكرا علي اللمون يا بش مهندس محمود , هو فعلا في شوية هجوم علي شخص بعينه صحيح , بس هتعذرني لو قريت مدوناته الجميلة الناحية التانية ,وشكرا عالاضافة

mindonna said...

بردت قلبي بكلامك ياأستاذ راء , عموما أخرتها ان انا مش هعلق في مدوناته تاني لأن اكتشفت ان المسألة مسألة عناد مش تبادل أراء
ترفشخنات دي خليط الفته ما بين ترهات و أفشخنات و مايندونا خليط بين مايند العقل , ودونا السيدة بالايطالي
ايه رأيك في الفزلكة ؟:)

zeinab said...

mmm, howa fe3lan into eletnein mesh mesta7meleen 7ad yekhtelef ma3ako fel ra2y, bas afteker moshkeltek tacticiya aktar, howa dayman sab2ek bekhatwa.

ana ba2ol tezakry shwaya we tel3aby shwayet sheesh wala 7aga, we terga3eelo tany.

we sada2ney mesh batarya2, bas ma3rafsh leh 3andy meil enny a3mel mowazana lel qowa, beghad el nazar ana mwaf2a m3 meen. yemken 3shan keda el 7ewar hayeb2a moshaweq aktar.

AZ said...

والله يابنتى انتى بديتى التحليل بدايه طيبه بعدين قلبتيه تخبيط يعنى ماكملتيش التحليل لآخره بصوره منطقيه.. يعنى لا منك قلتلى كلام منطقى افحمه ومكنش يعرف يرد عليه ولا منك اديتيله على بوزه بصوره تخليه برده مايعرفش يرد عليكى.. بس يالله ماحدش بيتعلم ببلاش هى تجربه ولازم تمرى بيها.. تخيشيلك مره فى ابليس يطلع عفاريته عليكى شويه :).. بس منى ليكى يعنى كده تحلى بضبط النفس وبلاش الاسلوب العاطفى فى الرد بتاع مش طايقاك وولع فى نفسك.. عشان تقولى لحد مش طايقاك ومايغلطش فيكى لازم تدعمى رايك بسباب منطقيه موزونه عشان ماحدش يطول لسانه عليكى وانتى مالكيش فى السكه دى
اما بالنسبه ليك يا اخ ابليس الخبيس ( مشيها خبيس عشان الوزن يعنى )هو انت عندك شك فى انك معقد؟؟ لو انت مش معقد يبقى كل الكلام اللى بتكتبه على البلوج بتاعتك كلام فارغ.. وبعدين مفروض تشكر البنت انها جاملتك وقالت معقد نفسيا ودينيا ومقالتش على بقيت العقد الاجتماعيه والمجتمعيه اللى بتعانى منها :)

Mohamed Jadelrab said...

اعذروني يا شباب بس أعتقد إن الواحد لازم يتدخل .. كتبت بعد إذنكم طبعا موضوع في مدونتي بفند فيه رأي الأستاذ سوسو أقصد إبليس في الأخت ميندونا طبعا أنا مش بقصد دعاية لمدونتي الوافدة الجديدة بس مش هينفع أكتب الموضوع كله كتعليق هنا فلو سمحت الأخت ميندونا أضع الرابط بتاع الموضوع ..

http://www.aboyousif.africa-web.org/?p=18

Mohamed Jadelrab said...

عتاب بسيط يا ميندونا .. لماذا لم تبدأي بالسلام كعادتك؟

أحمد said...

أيه دا ؟؟؟
هو الموضوع قلب بجد ؟؟؟

يا منديونا ، احنا على النت يعنى حياة افتراضيه و كل دا مجرد إشارات من الزيرو و الواحد
و بجد أنا لما اشرت في المدونة ليكى مكنتش اقصد أبداً أن ادخل في تحليل او هجوم على شخصك ... انا بتهمنى الرسالة مش المرسل ، لكن بصراحة استفزنى بعدها ردك لما تقولى لى روحى بص في المصحف

طيب جبت المصحف و بصيت على الصورة الفتح و لقيت الآيه صح ، ليه انت لم تنظرى الأول على المصحف ؟؟؟

في النهاية كل دا تهريج و مفيش سبب يخليكى تزعلى و تتقمصي للدرجى دى

حتى أنا لما قرأت تدوينتك دى قعدتك اضحك و كنت فاكرك بتهزرى !!!!

لكن مادام هزارى تقيل ، يا ستى أنا بعتذر ليكى إذا كنت أخطأت في حقك بشكل غير مباشر

و بقولها أنا آسف ليكى
بس بلاش نكد
كلنا هنا بنقضى و قت لطيف مفيش داعى نفسده بخلافات و وجع دماغ كأننا لسه في منتدى

و مرة أخيرة إذا كان هزارى تقيل انا اسف

Mohamed Jadelrab said...

لا أعرف موقف ميندونا لكني أعتقد أن مكان الإعتذار هو موضوع جديد في مدونتك لا كمجرد تعليق على موضوع في مدونتها، على العموم خطوة إيجابية أولى أحييك عليها

سؤراطة said...

انت لو رحت انتحرت يتنضف العالم شوية "من بلاويه "

يالا روح لليمين در و شوف لنفسك طريقة للانتحار

حقيقة أنا أعرف أن ابليس زعله وحش، ومتفهمة "القهرة" التي انقهرتها من أسلوبه "الباتر" في النقد، ولك الحق بعض الشيء، ولو إني مقدرة كم يضطر هو للاحتمال أمام "الكليشيهات" التي تشعرني - أنا على الأقل - بتنميل في دماغي
ولكن "دعوة" شخص للانتحار لا تصح لا على سبيل الهزل ولا الجد
ابليس حر طبعاً في أن يعتبره هزار أو جد ويتقبله أو ينساه أو يرد عليه
ولكن عفواً أنا أتحدث عن المبدأ
هناك أمور لا يجوز أن تؤخذ باستخفاف ولو في "خناقة" افتراضية من هذا النوع
علك - وأنت قارئة مطلعة - تطلعي على ما يكتب بشأن مأساة الانتحار وتدركي أنها لا يجوز أن تعامل باستخفاف هزلاً أم جداً
ومن يناقش في المبدأ لا يجوز أن يرد عليه إلا في المبدأ
كما قال رامي العزيز: "اللعب في الكورة مش في رجلين اللعيب" "

و دعوة شخص للانتحار أمر لا يجوز قبوله تحت أي مسمى
كلماتك التي كتبت قد لا تجد صدى لدى ابليس، ولكنها قد تجد صدى لدى آخر ممن يقرأون لك - ولو بالمصادفة - ، متعلق في تلك اللحظة في الدنيا "بقشة"، فيتبع نصيحتك "وينضف العالم من بلاويه"
وقد تتعرفي - لدى اطلاعك - على تفاهة ما قد يدفع الانسان في لحظة بعينها لإنهاء حياته بنفسه، والتي عادة ما تكون "قشة" مثل كلماتك التي ألقيت دون اكتراث

عذراً لو كنت أزعجتك بكلامي

Aladdin said...

أؤيد رأي أ.ز. الصوت العالي يدل على ضعف موقف صاحبه.

سعدت - حقيقة - بلقاء إبليس أكثر من مرة (خارج) العالم الافتراضي، ولست متسغرباً هذه الحمم البركانية التي يقذف بها من آن لآخر رغم أن الانطباع الذي أخذته عنه أنه أنسان هادئ الطباع و"مسالم" إلى حد كبير!!!

اختلفت - أكثر من مرة - مع إبليس في طروحاته في الآونة الأخيرة، وهو ما ظنه توجهاً "عدائياً" مني! ثم أوضحت له في مدونتي إنني لا احمل مشاعر عدائية ضد أحد من المدونين - بل على العكس - بل لعلي اكتسبت من التدوين أصدقاء حقيقيين (لا يسع المقام لذكرهم) وقفوا بجانبي في أوقات الفرح والحزن.

أنصحك (لوجه الله) أن تطلعي على الحوار "الحقيقي" في مدونات أخرى لها وزنها، مثلا تابعي الحوار بين ابن عبد العزيز (العدالة للجميع) وحمشكة (الخرز الملون) حول قضية "الإسلام كده ولا مش كده" بعد أحداث شرم الشيخ. أيضا مدونة لون وولف والجدل الجميل الذي كنت طرفاً فيه وبين سامية جاهين وزوجها عمرو حول الإسلام والإرهاب.

لا ينبغي أن نكون نسخاً متطابقة فالعالم اليوم لا يتحمل هذه "الترهات" ومحاولة تحويل البشر إلى قوالب فكرية "مستنسخة" ليس - في نظري - إلا "افتكاسة" سخيفة!!

mindonna said...

ردا علي أ.زي , فجايز يكون عندك حق ان انا اتنرفزت شوية (لا شويتين ) عشان حسيت ان مفيش مساندة من اي حد لوجهة نظري , و تقريبا كان كلو متوجه لصالح ابليس الخبيس علي رأيك
انا برده حسيت ان انا كده اوراقي انكشفت لما اعدت اشتم و ازعق , و اديني اتعلمت حاجة
أما سقراط , فدا عندك حق فيه , لاني احيانا كنت بمر بفترات منيلة زي دي , و لو كنت قريت لحد بيقول الكلام اللي انا قلته أكيد شوشو كان هيلعب في دماغي عشان اخلص من نفسي
و علي رأي برده أخينا علاء الدين , انا بنبح في صوتي ليه علي قلة فايدة !! مروح اتناقش في الدين مع أهله
و علي العموم شكرا علي كل الاراء اللي اكتبت
:)و باين فعلا ان ابليس شهرني و لا ايه

mindonna said...

ابو يووووسف , انا ملقيتش حاجة في مدونتك ؟

Mohamed Jadelrab said...

مدونتي هنا يا ميندونا

ديوان أبو يوسف

أنا عامل حساب ع البلوج سبوت بس عشان أعرف أتفاعل معاكم ..

Hamuksha said...

1. يبدأ نجيب ريحان كل تدويناته بل وكل تعليقاته بكلمة سلام. ونظرا لأنه قليل الكلام جدا،تكون كلمة "سلام" أحيانا هي نصف التعليق إن لم تزد. ولم يحدث أن هاجم نجيب أحد بسبب إصراره على "سلام" أو التحدث بالعربية "الفصحى" دونا عن كل مواطنيه المدونين من البلد الفرانكفوني.

2. إبليس يدعي أنه لا يهمه المرسل بل الرسالة، ولعله سمع هذه العبارة في مكان ما وأعجبته وأراد استخدامها على هذا النحو الذي يجعله يبدو مجردا ومحللا. والحقيقة العارية أن هجومه كان شخصيا إلى أبعد حد، ولم يقدم لنا أي فذلكة مفيدة عن خطاب صناع الحياة مثلا، إذا صح أنه توجه مندونا، بدلا من التشكيك في كم قراءاتها الذي تشير له بـ "كتيييير".

3. الادعاء في لحظة معينة أن الكلام كان مجرد هزار، للظهور بمظهر البريء والمسالم والراغب في لحظات لطيفة، من السمات الإبليسية الصميمة. وهي حيلة رخيصة في ظني.

4. تحويل مدونة الواحد لساحة معارك لا يجعلها أكثر من مدونة صفراء، وموهبة الشتيمة ليست شيئا يدعو للإعجاب أو الفخر. هناك قاعدة عامة في رأيي: أي شيء وكل شيء قابل للسخرية والشتيمة، وهو ما لا يثبت أي شيء ضد الطرف المشتوم أو مع الطرف الشاتم، مهما كانت الشتيمة تجيب حاجة لدينا نحن الحاضرين للشماتة والانتقام. حسنٌ أن نطعم مداخلاتنا ببعض الردود اللاذعة، لا أن يتحول الموضوع برمته لمباراة رخيصة في فرش الملاية.

5. عذرا، ولكن أعتقد أن إبليس آخر من يتكلم عن الأخطاء الإملائية (راجع "امبروطوريه" عنوانا لمدونته الأخرى). كما أظن أن مندونا عادت لنسخة من المصحف كتبت فيها "سنة" بالتاء المفتوحة، راجع هنا.

6. أرى أن "قوة الجهل" (ولا أقول وقاحة) موجود عند الطرفين. وإذا بليتم فاستتروا.

Hamuksha said...

آسف، قصدت ريحان نجيب.

mindonna said...

يا سلام يا حاموكشا , نفس الكلام اللي كنت بفكر فيه ناحية ابليس انت قلته
فهو بارع جدا في اللعب بالالفاظ , و يمكن لما يكون هو غلطان في لحظة يقدر يقنع الناس انه كان صح
و حتي لما جه المدونة و اتأسف دا برده مش من طيبة نيته لاسمح الله , فدا علي ما أظن عشان يطلعني انا اللي ناقصة عقل , وهو اللي ياعيني بيتنازل بمنتهي الموضوعية و العقلية السمحة عشان يتأسف (لو كنتي فهمتي الموضوع شخصي يعني )بس عموما يعني لو طولنا في الموضوع اكتر من كده يبقي سفسطة ملهاش فايدة :)

Aladdin said...

سرني مرورك وتعليقك يا صديقي حمكشة! لعلك تشاركني تحول مدونة إبليس إلى ساحة "معارك" فلا أفهم - بصراحة - الداعي وراء تخصيص أكثر من تدوينة للهجوم على أشخاص وذكر أسمائهم علانية!! فعل هذا مع شادي (حزب العواطلية) ومع صاحبة هذه المدونة! فهمت أنه ضد الفكر القومي والعروبي والإسلاموي (بل والإسلامي) لا أدري؟

كما قلت سابقاً، الحوار الهادئ مفيد لكل من الطرفين، لكن تحول المدونات لمعركة ينتصر فيها الأكثر قدرة على "القفشات" وإطلاق "النكات" اللاذعة فأظن أن في هذا مضيعة للوقت!

شكراً حمكشة.. وفي انتظار تشريفك لمدونتي (هناك موضوع ينتظر تعليقك المستنير)

littilemo said...

ايه الحلاوه ديه

اديله بوكس فى وشه

اصل ابليس ده فعلا زى ما بتقولى
واصطدمت معاه كذا مره

ومع ذلك هو ذكى بس محتاج تظبيط الكام صاموله

unknown said...

إبليس يعتذر

دى تستاهل تدوينه لوحدها

Anonymous said...

Keep up the good work » » »