Friday, August 26, 2005

~~مرسال المراسيل~~


سلام عليكم.....

كنت قاعدة مع صاحبتي (ر) العزيزة , لما كنا في معسكر في (اسكندرية ) و كنا قاعدين علي الكورنيش بالليل ووشنا للبحر و معانا كباية الشاي بالنعناع العتيد و الهوا الرباني الجميل , يا سلااام يا (ريري ) و لا قاعدة خمس نجوم في أي كافتيريا قافلة و مكيفة , مش كده ؟
- اه و الله فعلا و أحلي حاجة ان احنا في معسكر من غير أهالينا الحلوين اللي كانو هيجرجرونا وراهم في الرايحة و الجاية
- اه فعلا , كان زمانهم لسه بيشوروا نفسهم هيقعودوا النهارده و لا هيتفسحوا، ولو هيتفسحوا هيروحوا فين
- اه صحيح , معرفتيش ان فيه مجلة لازم نعملها في آخر الاسبوع؟
- مجلة ايه دي !! هو احنا في ابتدائي؟ اتجننوا و لا ايه
- قالنا ممكن تكتب أي حاجة احنا عاوزينها
- ممممم
و بعد فترة من التفكير لا بأس بها توصلنا الي إن احنا نبعت مراسيل للناس الحلوة اللي في البلد. بما ان احنا شعب الملاوعة و الرسايل و التلاقيح اللي من ورا لورا بسبب ما عانيناه من آلاف السنين من القمع، فاتعودنا إن كل شيء بالتلميحات لغاية ما اخترعنا النكت والالفاظ و برده الأشعار و القصص الرمزية!!

و العبدة لله، بقايا أعصابها متستحملش تتابع كل الأغاني بتاعة اليومين دول..... لكن صديقتي (ر) أعصابها متينة و الحمد لله حافظة أغاني كتير من الجديد. فتعاونا معا لنبعث المراسيل دي :

- حستي ..أقصد حسني مبارك : خايف أقول اللي في قلبي

- أحمد نظيف (بتاع القطنة مابتكدبش): يا نخلتين في العلاااااالي
- صفوت الشريف : كل مرة أشوفك فيها ببقي نفسي أ...أ... اااااه
- الشيخ المفتي : كل دا يطلع منك انت
- نوال السعداوي : الدنيا مج مج نونة نونة نونة
أما وزير الثقافة فاروق حسني فاختلفنا فيه كتير، ياتري نبعتلو تهنئة علي أقدميته الساحقة في الوزارة ، و لا علي هواياته الخفية اللي خرجت عن مواضيع الفن خالص ؟!!
المهم غنيناله : كلام الناااس لا بيقدم و لا يأخر ....كنوع من المواساة لسيادة الوزير اللي بياكلو في سيرته يا عيني!!
- أمريكا : هما مالهم بينا يا لييل
-أيمن نور: كلهم بيقولوا كده في الاول (مع اني بفكر انتخبو يا جماعة )
-عمرو موسي، بالتأكيد : ظلموه...اااه...ظلموه
(و يمكن كانت في مراسيل تانية بس أنا مش فاكراها)
و حبينا نغني للبحر برده حاجة ... بس البحر باين انه كان قرفان من صوتنا لأنه طرطش علينا بموجة جامدة ...و ماله ... ضرب الحبيب زي أكل الزبيب !

~ ~ ~ ~

-أنا توصلت لسايكولوجية خاصة بالبحر يا (ر)
- و ايه دي بقي ان شاء الله ؟
- مش أحيانا تلاقي البحر لونه أزرااااق اوي و مزهزه كده يوميها بيكون البحر فرحان ، ولما تلاقيه تاني يوم لونه باهت شوية بيكون زعلان .. جايز يكون يوميها حد غرق في البحر و لا حاجة ... و دايما بحس انه بيسخر مننا البشر أوي يا (ر )، و اكمنه يا عيني بقاله آلاف السنين بيسخر مننا بقت السخرية مريرة، زي الناس الحكما العارفين كده يسخروا و ميقولوش حاجة
- ربنا يشفيكي يا بنتي
- ( زغرة من عندي مع شتمتين حلوين)
نستمر في تأمل البحر و الاستمتاع بالهواء الرباني اللوكس أبو فايف ستارز، متأملة سخرية البحر اللي بتشاركوا فيه -رفيقته الابدية ليوم القيامة- السما. آه يا (اسكندرية) ..... ياللي واخدة سمعتك الحلوة علي قفا البحر اللي قدامك ... إنتي فعلا عروسة حلوة

~ ~ ~ ~

10 comments:

Ahmed Shokeir said...

أمى مسافره .. وهاعمل حفله

ياترى هاتبعتيها لمين

mindonna said...

ممكن الأغنية دي تغنيها الحكومة لكوندوليزا رايس :)
و برده نغني أغنية لنعمان جمعة أغنية
ام تي ام
اركن علي جنب

Lasto-adri *Blue* said...

لاء.. معلش بقى ومافيناش من زعل:
إركن على جنب دى محجوزة لالصبحى
:D loooool

أنا بحب موضوع الأغانى دة.. دايما بنعمله فى حفلات التخرج كل سنة عندنا فى الكلية بس على المعيدين والدكاترة.. وبتفطس من الضحك

على فكرة أنا قرأت عند رامى إنك عشتى فى اليابان.. بس ياترى تقدرى تدلينى فى أسماء مغنيين من هناك؟

Pianist said...

علي فكرة اسكندرية مش حلوة لمجرد وجود البحر ومش واخدة سمعتها علي قفا البحر
اسكندرية حلوة عشان كل ذرة فيها حلوة ويا بخت البحر انه موجود في اسكندرية
اعذريني مع ان اسلوبك حلو في الحكي بس حكاية الاغاني دي معجبتنيش انا اسف بس ده رأيي الشخصي طبعا

mindonna said...

لست أدري :أنا أعرف مغنيين يابانين (عدد لا بأس به ) لو تحبي تعرفي
في هناك من أشهر الفرق الروك الشعبية glay
&l'arch en ciel
و في مغنية اسمها aiko بحب اغانيها و صوتها بيعجبني برده
الروك الياباني مميز و تعرفي تفرقيه
علي طول عن الروك الأجنبي
(زي لما تحسي ان في فرق بين الروك البريطاني و الأمريكاني
و علي فكرة بيدخلو انجليزي كتير في الأغاني , مع اني مش عارفة مالو الياباني :)

mindonna said...

انت حر طبعا يا بيانست في رأيك طبعا و لا يهمك
أما علي حكاية اسكندرية , فمتزعلش يا عم الاسكندراني خلاص ,انا عارفة اد ايه الاسكندرانية بيحبو مدينتهم
بس أنا برده حرة في رأيي , و لا ايه ؟:)

ايــــــــــــــــــوب said...

مع انى مش اسكندرانى لكنى بحبها أوى خصوصا فى الشتا
أما بخصوص حكاية السمعه اللى على قفا البحر فاحب أقولك ان البحر موجود كل حته لكن تظل الأسكندرية هى المكان الوحيد الباعث على التأمل والتخيل-تماما كما حدث معك- بل والفلسفة و الجنون أيضا - كما تصورت صديقتك أو كما تغنت أحد الفرق الموسيقية السكندرية-فرقة خالد شمس
اسكندرية ماهيش كورنيش
ولا هىّ بحر ولا زيزينيا
اسكندرية ناس بتعيش
وكأنها.. مش فى الدنيا

mindonna said...

هو أنا برده حسيت بنفس الاحساس دا ،اسكندرية ليها طابع مميز جدا و مش معني ان انا بقول علي حكاية قفا البحر دي ان انا بكرها مثلا بالعكس ، أنا بحبها جدا ونفسي حتي أروح أعيش فيها لماأكبر:)
بس أنا بس أفترضت يا تري لو البحر مكانش موجود كانت هتبقي عاملة ازاي
أكيدشويةمن بريقها هيروح و لو حتي مش كل البريق
بس أحلي ما في اسكندرية انها ساحلية
و أكيد هي من أكتر المدن الساحلية اللي ليها طابع متلاقيش زيو في العالم كله
و خلااااص بقي دي مكانتش كلمة !!

Anonymous said...

Excellent, love it! toyota yaris qld. australia toyota part Hawaiian dress patterns http://www.sport-mp3-player.info Bel 980 radar detector Mortgage healthcare estate refrigerators Marcita bentley Data recovery tulsa Free blackberry mid ringtones dice craps for sale Palm beach bingo blondes g string sex

Anonymous said...

Wonderful and informative web site. I used information from that site its great. » » »