Wednesday, October 05, 2005


أكليشيهات إنسانية


استيقظ علي نور الصباح الشاحب يدخل من الشرفة ...برد الصباح يتعب صدري و أوصالي .... أتذكر من أنا و أين أنا ،ثم أعود إلي واقع بأن قد وجب الذهاب إلي كليتي المبجلة
أغسل وجهي و ألبس في عجل ، وسط ذلك كله أسمع شكاوي أمي الصباحية ، دائما تشتكي من شيء ما ... تشتكي من الأطباق المتسخة التي لم تغسلها بناتها ، من أخي الذي يعود متأخرا دوماً ...من أي شيء ..فقط تختلق الشكاوي

و أكثر ما يستفز أمي هو أن تري شخصاً هادئاً حينما تكون غير رائقة المزاج ، و بما أن العبدة لله دائما هادئة من الخارج فقد أنال من الكلام المعسول قبساً : تخاطب أبي :
-ولاّ بنتك دي اللي مش بتروّق حاجة في البيت

الأب :.......

-فالحة بس تكوملي في كتب و جرايد

أنا : ماما ...مالكيش دعوة بالكتب دي ، أنا هلمها في كراتين و أتكفّل بيها

-طب روحي ياختي تكفّلي بالكبّاية اللي بتشربي فيها الشاي حتي و تغسليها

بالطبع لا أعلق بعد هذه الكبسة فأهرول مسرعةً ناحية الباب و أحاول ألا أصفقها ورائي
*********

في السنتين القادمتين قد عزمت أن أذاكر فيها بجد ، ليس من أجل عيون كليتي الفخيمة ، و لكن -علي الأقل - كي أحصل علي بكالوريوس تقدير (جيد ) حتي ..
و لكن ليس نيل المطالب بالتمني...
-أنا : بت يا (ن) انتي فاهمة حاجة من اللي بتقوله الست دي ؟
-ن: يعني .....طشاش
وأحاول التركيز مراراً، و لكني أروح في غيابات أخري دون غيابات (الكيمياء الطبية)، و قلمي يتحرك علي الأجندة لكي يرسم فتاة ملولة
تباً....التركيز التركيز التركيز

? أين أجدك
***************
ن تحب معيداً أحمقاً في الكلية ، لا أدري كيف تحب رجلاً ثقيل الظل هكذا ...و حينما تتكلم عنه بوله و تزعج (أنفاسي )أقول لها متفزلكةً:
صحيح ... و للناس في الحب مذاهب

و العبدة لله في حد ذاتها لا تري سوي معيداً معتد النفس( فرحان بنفسه يعني )و يبدو أنه كان يعاني من عقدة نقص ما
فذاكر بجد كي يعوض هذا النقص فيصبه بعد ذلك علي طلابه المساكين أمثالنا في المستقبل
أقول لها ذلك ،و أضف بـأنني قد رأيته و هو يأكل ( سندويتش الطعمية ) و كانت الطعمية عالقة في شاربه فكان شكله مقززاً للغاية
و لكن الحب ليس له حدود ....مثل الحماقة

*******************

أخرج من كورس التعذيب المسمّي ب( المحاضرات) و أذهب لشراء القهوة ، أري ولداً صغيراً يبيع المناديل ، أراهم دوما في كل مكان ، تري هل شعروا يوماً بإحساس الأمان في كنف الأب و الأم ؟ أم أنه لم يتعرف يوماً علي شيء كهذا ؟ و لماذا يأكلهم الضياع و هم مازالوا أطفالاً هكذا؟
تملكني الغم ...مثل كل يوم
********************
أري سجائر الفتيان تشتعل من حولي و يشتعل صدري معها ، فسجائر النهارأفضل من سجائر الليل أحياناً ، اااااخ ياني يانا
أرمق (ي) و هو يدخن سيجارته ، و أتساءل تري ماذا سيفعل إذا أخرجت سجائري و أشعلتها حالاً ؟
-يا (ي) معلش ، روح دخّن بعيد
-إيه؟...ليه .
-أصل أنا بكره ريحة السجاير
*********************
حوار قصير مع العرف و التقاليد :

أنا : انت يا معفّن انت
العرف و التقاليد : مين ؟ ...أنا ؟
أنا : أمال أمّي ؟!!
ع: أي خدمة يا ست
أنا : ياوش المصايب ، يا أساس كل مشاكلي ، يا أصل العُقد كلّه
ع: لأ لأ ، أنا مسمحلكيش يا آنسة ...من فضلك ، أنا ماليش ذنب ، الناس هما اللي عملوني كده ....أعمل إيه ؟ مش أنا اللي خلقت المشاكل ، أنتو اللي خلقتوها
أنا : عجبك كده ؟ أنا كمان هيجيلي بسببك مرض الإزدواج و الرياء !!
ع: يبقي دا برضه ذنبك انتي ، انتي بتدخني ليه طيب ؟ انتي اللي غلطانة ! ثم انتي جبانة ، متعترفيش ليه و تخلّصي نفسك ؟
أنا : مانتا عارف اللي فيها ، الله يخربيتك
ع : برضه بتغلطي ، يا آنسة الناس بتبرر نفسها بيّا و تعمل اللي هيا عايزاه ، الرجالة تعمل اللي هيّا عايزاه بإسمي ، و الستات تتسرفل في عباءات الحياء عشان تخفي فضايحها ...بإسمي برده !!، أنا من صنع بشر يا روحي ، أنتو بابا و أنتو ماما ، احمدي ربنا انها جت عالتدخين يا شيخة ، في أنيل منك كتير
أنا : مش قعدالك فيها و حياة أبوك و أمك
ع : يا حلولو....انتي متقدريش تهربي مني برده ... ازاي تمشي كده علي طول ؟ باباكي و مامتك هايسيبوكي يا قطة ؟

**************

أسير في الزحام عائدة إلي (شبه)البيت ،أناس كثيرون من حولي يمرون أمامي ، كل له خاطره و همومه وأفكاره ، و كل واحد منهم هو بطل كونه
ويحك أيها الكون ....لماذا تستغفلنا هكذا ؟

*****************

أصل إلي البيت ، أذهب إلي الحجرة و أهوي علي السرير و عينيّ مسمرتان علي أي شيء،و أجد نفسي أردد هذا السؤال الساذج الأبدي :
-هي الدنيا وحشة كده ليه يا رب ؟
أتذكر أياماً كانت الإبتسامة لا تشوبها شائبة ، و أخطط لأشياء وهمية أفعلها في هذا اليوم ....و أنام

12 comments:

Michel Hanna said...

روعة!
كلام يلمس القلب فعلا.

S H E B A K said...

لما تقابلى الاخ ع ده تانى
تقوليله على لسانى : جتك
نيله فى خبتك التقيله

KING TOOOT said...

الأخ( ع ) بيقول كلام
غلّبنا من ساعة ما قاله
و الأخ ( ع ) يعمل حاجات
مطلوب كتير نعديها له
و الأخ( ع )بيبيع حقوق
و يوزع الناس فى الشقوق
عم أبراهيم و معاه فاروق
و أبن المحله يروح دسوق
و فريده و أحمد مالهومش ضوء
علشان مابلاعوش الخازوق
و كمان بيحكم عالحياة
و يخللى بين الناس فروق
دى بتبقى أحسن لو لابسه حشمة
مع أنها حقيقتها نيله
و ده يبقى طيب لو عنده أزمة
مع أن عنده ميت ألف حيله
و كأن( ع )راح احتكر
كل الفضيله
و عــجــبــى!!! ؟
_____________________________
KING TOOOT

mindonna said...

ميشيل : انت اللي روعة يا ميشيل :)

عماد : ما تخافش الرسالة هتوصل و لو عايزني ابعتلك معاها بوكس في مناخيره أنا معنديش مانع

كينج توت : يا عيني علي الكلام أهو دا الكلام :)، بقولك خسارة في الكومينت مش مصدقني ، لازم تجمّع الكلام دا كله في ديوان يا كينج توت

KING TOOOT said...

ما أنا عندى المدونه بتاعتى
kingtooot.blogspot.com
KING TOOOT

mindonna said...

لا يا توت

أنا أقصد ديوان ، مش مدونة
;)

Pianist said...

تفتكري ان الكون هو اللي بيستغفلنا ولا حد تاني؟
سيبك انتي
انتي نوع سجايرك ايه بقي؟

mindonna said...

بشرب نيكست اليومين دول ( الأزرق ) مش غالي أوي و مش بطال

بس لما أكون عايزة أتمزك يبقي مومو ( مارلبورو أحمر ) :)

أما علي حكاية الإستغفال ، أنا أعتقد ان البني آدم هو اللي بيستغفل بنفسه لما يفتكر أنه يقدر يعمل كل حاجة لوحده

freeSoul said...

just one note.

"el mo3eed" the idiot as you called him at least had a target and managed to do it (in most cases), he has something to live for, and to a good limit, he is successful in that

about those children, do you think they give a shit for a mother and father? a thing that I newly realized is that we created those monesters and we cry for them everyday, for them, it means nothing and I almost know they don't think of that nonsense we say about their future and their lives and future :)

about customs, follow it and you lose your soul, fight against it and you will lose your life :)

try to learn how to live with it without paying much attention to it, try to live independent from it, by the way i don't support smoking much, I was a heavy smoker and I stopped at a level when I realized that I am so stupid to do so :)

mindonna said...

شكرا يا فري سول علي الرد

هو المعيد اه له هدف و جميل و كل حاجة ، بس كونه له هدف دا مش هيخلي شخصيته جميلة ، بالعكس هو من الناس اللي هوايتهم تعجيز البشر اللي أصغر منهم و اللي زيوا مالي البلد كتير ، مش عارفة دي حاجة نابعة من التربية و لا لأ

الإنسان اللي كان له هدف و حققه مفروض يمهد الطرق لغيره لو بإيده مش العكس
لا أصل أنا أعرف المعيد ده عن قرب نظرا لأنه كان يعرف صديقتي (ن) كويس

بس طبعا مش كل المعيدين كده :)

أما الأطفال ، لا أعتقد انه يهمه الأب والأم ، حتي لو هو مش مهتم فدا عشان مش واعي بوجودهم أصلا
قريت مرة عن ان الواحد لما بيتحرم من حاجة زيادة عن اللازم ، دا بيخلي المرء يحس بالنفور للشيء اللي اتحرم منه
و دا اللي أكيد بيحصل مع الأطفال دول
أهم حاجة بتخليني أتنكد لما أفكر في مستقبلهم ، لما هيكبروا هيبقوا عاملين ازاي ؟

أما التدخيين ، أتمني ان انا أبطلها ، بس حاليا معنديش نية عشان أنا جبااااانة
جايز لما ألاقي ليها تعويض :)

Amira Tahawi said...

هاي ، هل تابعت خطوط المبدع سعيد الصكار ؟ بفرنسا ؟ لديه مدرسة و له خطوط باسمه ايضا ، مع ودي

mindonna said...

شكرا يا ميراهي علي المعلومة:)

لا أنا مكنتش عارفة
حاولت أدورله علي حاجة معرفتش
لو تعرفلو جاليري في النت ياريت تقولي عليه
سلام